ياسر نور / يكتُب : مجرد رجاء للوطن

#مجرد_رجاء_للوطن

أرجوكي شديني بقى
من جوه قلب الشرنقه
أو لفي حبل المشنقه
حوالين رقبتي السِمسِمه
أنا روحي بتفرفط خلاص
عطشانة لكفوف الخلاص
أو طلقة من نار الرصاص
تقتل مواجعي المؤلمه
أرجوكي ..
كل الأماني مشعلقه
وانا قلبي ملّ الإنتظار
وانتي اللي شجرة مُورقه
ورامية فرحِك ليل نهار
ع الغريب !!
واللي جار !!
اشمعنى قلبي للشقا ؟!
ونصيبه راح
مع إنه زقزق زقزقه
رغم الجراح
وطرح غُناه للشقشقه
مليون صباح
أرجوكى ..
ما تقُصي شيء من فرحِك المفرود بلاد
وتغطي قلبي اللي من يوم الميلاد
عريان بحُزنه وسط أفراح الولاد
أرجوكي ..

#ياسرنور