عن الأسرار بقلم الشاعر : محمود رضا

عن الاسرار ،،
قلوب بتدور ف الف مدار
عن ال آهه ،،
و روح بتلف ف متاهه
و دمع بيسبق الأحداث
عشان عارف مرار الكاس
و حاسب حرقة الأنفاس
و شاهد ع اللي باع الحب
و شاهد ع اللي قلبه انداس
عن الكلمه الي مش حاضره
عن الدقه الي مش صابره
و عن الوجع اللي بات يحلم ،،
يشوف الشوك غيطان خضره
عن العيل ف ليله العيد ،،
و لبس بيحضنه بكفه
عن القلب اللي مهما يزيد / ف عمره ، الحلم بات ناصفه
عن الاسرار هقول تاني
و ههدي لحون آهات قلبي لكل الكون
عن المضمون ،،
و مين ضامن و مين خون ،، !
عن الاحلام ،،
و ليه بتهون و تتلون ،، !
عن الدرس اللي مش معلن
لكن كل القلوب شايفاه
و حب بيبتدي دايما
ف وقت ما تنتهي نشواه
عن الاسرار ،،،