إذا قررت بقلم الشاعر : أدهم الزهيري

إذا قررت أكون جاحد باكون جاحد 
واذا قررت أكون واحد مالوهش مثيل 
ف انا أسطورة في التمثيل 
وبأخدع كل جماهيري
إذا برمجت تفكيري 
يصارع سرب أفكارك
بأول جولة هأختارك
ضحية رغبتك ف عناد
ودايسة بالغلط في زناد
موجه ليكي مش ليه
بلاش اللعب ياصبية
غبية بكل أفعالها
بلاش تستهرى بيا
لأن السكة أهوالها
أكيد صعبة ولا تنطاق
بلاش تتحولي لأشلاء
فتات م الصعب يتلملم
جراحي غبية بتعلم
ماتتهاونيش
سيبني أعيش
بدون شوفك
كرهت الإسم وحروفك
ناحتهم فوق جدار ذلي
بلاش بدموعي تتسلي
دموعي كفيلة تغتالك
نصيحتي ضروري أقولهالك
أنا في الحب أعيش هالك
وأنا في الكره أعيش هالك
ف شيلي العند من بالك
تلمي بواقي إهمالك
ويالا رحيل
رحيلك عني أبقالك من الوارد
أنا في الجرح سيف شارد
مابيفرقش
ما بين ذكرى وبين عشرة
جيوشى بنارها منتشرة
ولا بتطاطي في معارك