أنا الإرهاب إرتجالة بين الشاعر : إسلام دهشان والشاعر : مصطفى ممدوح

أنا الإرهاب
وأنا الأسباب لكل خراب
أنا إللي اتقال عليا عميل
وأنا إللي الشيلة لما تميل ،،
يقولوا إن الفساد مني !!

دا أنا إللي ف فرحها بغني
وأنا إللي ف جرحها بغني
بلاش يا بلدنا تتجني
ويسرح في العباد جورك

أنا صلبك ،، وجمهورك
وأنا السادة
بلاش تكويني بزيادة

جريمتي لحية وعبادة
ونفس نقية عبادة
تهمكم ليا معتادة
ومتعادة 200 مرة !!

شربتوا السم من برة
في كباية عسل سودا
رضيتي تكوني مضطرة
ياحرة ،، وتمشي ع الموضة

جاريتي الغرب في الهوجة
بإن الملتحين لعنة
ركبتي معاهم الموجة
فقولتوا إن إحنا ولعنا
وقلعنا الشجر لاخضر

وسيبتوا العقل متخدر
ونايم في العسل نومة
بتضليلكم هنتأخر
ولا تقوم للوطن قومة
يامكلومة بأبنائك ،،

قوليلي مين كسر عينك
ولوحول الفساد ساقك
ومين ضلك ،،
ومين ذلك ،،
ومين خلى الغباء دائك ؛
ومين سامك أذل عذاب ؟

أنا الإرهاب ،،؛
لإني بصلي في الجامع
ماسيبتش فرض
أنا الإرهاب
لإني بنادي بحقوق الشعوب في الأرض ،،

أنا الإرهاب
عشان ماسك على ديني
مافرطتش
أنا الإرهاب
عشان قرآني ف يميني
ماحرفتش ،،

أنا الإرهاب
عشان شايل هموم الدين مع العترة
وديني سماحة ،،
ديني يسر بالفطرة

أنا الإرهاب
أنا الدعوة ،،
وأنا الدعوة إللي ف الغمة
أنا الإرهاب
أنا الجلابية واللحية مع العمة
قوليلي بس مين هما ؟
لو اتسموا

أنا موافق أكون إرهاب
أقولك ،،
هحلق اللحية
وأشد قميص ،، وكرافتة
وأنادي في الميدان : ‫#‏تحيا‬
‫#‏وأحارب‬ في الشيوخ حتى
مايبقاش فيها شيء مسلم !!
وأعيش أبكم ،،

ومش هنزل أصلي الفجر في الجامع
وأنا سامع
أدان ربي !!
وأعيش تايه ،، ومن تاني
تقولي عليا علماني
وغاوي في البلدي خراب ،،

وهيكفرني إعلامك
وتتهميني بالإرهاب !!!

قوليلي يعني إيه إرهاب ؟؟؟
قوليلي يعني إيه إرهاب ؟؟؟
قوليلي يعني إيه إرهاب ؟؟؟

أنا الحاكم ،،
أنا الطفل إللي متسرطن
أنا الظالم ،،
وأنا المظلوم وبتفرعن ،،
أنا الأرعن

أنا المجرم ،،
وبرضه ‫ بريء‬
وأنا الجاني إللي عاش ‫ متساب‬
أنا الإرهاب !!!