لو قالولك بقلم الشاعر : علي أبو بكر

لوقالولك روح وصوت
قول يالهوي
واملى كل الكون صويت
كان حقيقي عليك يا اخويا
لسه بدري
وعيش حزين
وان قالولك راح نعدل
أو نبدل
أو نجيب الشرق غرب
والشمال يصبح يمين
قول آمين
حتى لو ماشي وما قولتش
واعترضت وما اعترضتش
جوه نفسك روح وفتش
غنت أصلا تبقى مين
دا انت واحد زيي زيك
زينا كتير م الهاموش
رأينا معدوم وضايع
وسط أنياب الوحوش
أو بتلهينا المعايش
لجل حبه من القروش
والحقيقه إننا
جوه خوفنا مسجونين
نمشي في دروب السنين
محرومين
نبقى كوره بيشطوها
الكبار ويوصلوها
للمرض والجهل توهه
واحنا فيهم مسجونين
يعني مش هيفيد صواتنا
لو نصوت مجبرين
والخلاصه
إننا ننسى اللي فات
واللي جاي من سكات
واننا نفكر في يومنا
واننا نصوت صوات
لو جابولنا لقمه حلوه
ويا ورقه
من فئات الخمسينات