حمدان ابو شهبة / يكتُب : ف قلب البنت

ف قلب البنت فزورة
ياتكسبها ياتخسرها
ف روح البنت كام صورة
ياتحضنها ياتكسرها
فقرر قول
وكون مسئول
عن السكة اللي تختارها
ولازم تبقي عارف شيء
( رصيد البنت أسرارها )
وتبقى أبوها وحبيبها
وعارف كل أخبارها
ولو فيه ذكرى وجعاها
بلاش أحسن تفكّرها
وقدّرها / وحسسها انها أمك
بطرف عنيها هتضمك
ماتحبسهاش ف مرة بقفل
أكيد هتراعي ربنا فيك
وايه يعني اما ترجع طفل
وايه يعني انها تربيك
فسيبها هي تكبر بيك
ولو صغرت تكبّرها
ولازم برضه تسكنها
وماتبصش ف مرة لحد
ولما تيجي تحضنها
يكون الحضن حضن بجد
دي نقطة ضعفها لمسة
وحضن كفيل يصبّرها