رواسب عشق بقلم الشاعر : إسلام النبوي

رواسب عشق جوايا
لحب بعيد أنا داريته
وكام لهفة ودمعاية
وبقول للناس أنا نسيته

يا قلبي تعبت وكفاية
تحن لماضي عديته
ما تنسي وتبتدي حكاية
وتعمل زي اللى حبيته
عاشت حياتها مع غيرك
وبقت قصته وبيته

فليه الشيبة والوحدة
وليه دايما تقول واحدة
مفيش غيرها اللى ساكناني
طب قولي إيه اللى جنيته
عايش ع الآهه والذكرى
وحلم جميل وكام فكرة
وتحن للحن غنيته

يا قلبي يلا شوف بكرة
وغير عيشتك العكرة
واهجر هم ربيته

وأنا هرمي صور انا شايلها
وهداياها ورسايلها
وهقطع ورقي اللى خطيته

وهبدأ حياتي ومنايا
أمثل دور أنا نويته
وتطلع مني ضحكاية
تداري رواسب عشق جوايا
تداري حب خبيته.