ومين فينا بقلم الشاعر : إسلام دهشان

و مين فينا لسه ماكلمش نفسه - و مين لسه حسه ما طالش النجوم ؟
و مين فينا برضو ماشالش الهموم ؟
و عايش معجز و هو الشباب 
و مين فينا لسه ما جاله إكتئاب ؟
و مين فينا حتى - ما عدى و ما خطى على ظلم سلطة - و حبة كلاب ؟ 
و مين فينا لسه بيهتف يعيش ؟
و مين فينا عادي و إشطه و مفيش ؟
و ماشية يا سيدي
كلبشك في إيدي
قديمي و جديدي - يقولوا إني حر !
و مين فينا لسه مابطلش جر ؟
حبالك طويلة - عيالك عويلة - و نيلك يا نيلة - بيسقيني صبر !
مرارك بيطفح - على كل جبهه
و نارك بتسرح - و نسأل سببها
هسبك و هلعن في كل اللي جابها
سياستك يا مصر ،
و هشتم في كل اللي قالوا إنه نصر
و فين المفر ،،،،؟
ده كهفك مضلم - و مسدود في آخره
و ظلمه مغرق - مراكبه و بواخره
و إعلام سيادته - بيشكر سياسته - حقيقته وثوابته - بيتهجوا شر !
يا قلبك يا مصر ، !
يا قلبك يا مصر ، !