جواك قلبك بقلم الشاعر : عمر فواز

مش كل جديد بيكون مبهج
احيانا م الافضل لينا
اننا نفضل كده .. وحدينا
لا نحب ولا نقرب ابدا
القرب ماهوش دايما احسن
احيانا بمعادله بسيطه
القرب يساوي انك تحزن
ولذلك فكر ف الحكمه
يمكن لو فوقت ف يوم تعقل
الوحده ماهيش دايما وحشه
احيانا بتكونلك افضل
او اجمل من جرح هييجي
وهييجي الوقت اللي بيضحك
وهتضحك وياه تكشيرتك
والناس هتقرب وتساندك
بالخير هتجيب برضه ف سيرتك
والحظ هيلعب ف ظروفك
والأمن هيقتل فيك خوفك
فاطمن من دلوقتي عشان
القلب الطيب من جواك
خلاك تقريبا بتقرب
من وصف ان انت هتبقي ملاك
مع ان طبيعتك بشريه
لكن جواك حاجه تخلي
كل اللي يشوفك بيحبك
جواك .. قلبك !