فلوماستر أبيض بقلم الشاعر / محمد إبراهيم

بنت الهوا..
حرك ستاير شعرها اتحول نسيم ..
بنت بوجع عيل يتيم ..
وبحضن مخلوق من شتا ..
بمشى لوحدى فى حضنها ..
وعيونها بتمطر دموع..
خدى اللى سبته ل كتفها
واديا نايمه فى كفها ..
تشبه اوى للصبح بدرى وحدتى ..
تشبه ل قاعدة مع جدتى
واخدتنا فيها الفضفضة..
بنت لازم تتسئل:
هوا انتى حلوة ازاى كده؟!
بنت بشجن ايام زمان..
تشبه اوى تتر لمسلسل تسعيناتتى..
تشبه اوى ضحكى ف وسط ولاد خالاتى ..
تشبه زيزينيا واوبرا عايدة وحصة الالعاب وكورتى..
تشبه حنينى لضحكة كانت
مالية صورتى..
تشبه لكل اللى انتهى ونفسى انه يرجع..