اتفاق بقلم الشاعر : عماد رشاد

خلينا متفقين إن الفراق مش شر ..
وان اللى حب الشتا .. حبه ف أوان الحر ..
نور القمر مبهج علشان بعيد عنك ..
كل اللي راح القمر قال إنه كتلة صخر ..
مش كل شيء لامع بيكون مريح للعين 
أكبر حنين جواك لناس بتسكن قبر ..
خلينا متفقين إن إحنا اصلا ضد
وان الفروق بينا زادت كتير ع الحد
شوفتيني ليه فكرة مش وقتها دلوقت
رسمتي ليه بكرة كدبة .. وليه صدقت
مين اللي قال اصلا أحلامنا مظبوطة
رغم الساعات جمعا صنعوها بعد الوقت
سرسبنا ليه روحنا وسط الأماني الحاف
وسعنا ف جروحنا وقلنا الزمان إسعاف
إزاي مفكرتش إنك متشبهينيش
وازاي قدرت أفهم روح القانون انصاف
جاوبيني لو ينفع للأسئلة إجابات
ليه اتنفيت مفرد .. ؟؟
واشمعنى انا بالذات ؟؟
كل اللي حبوني داقوا الرضا مني ..
كل حبيتهم سابوا اللي فيا مات ؟؟!
جاوبيني لو ينفع للأسئلة إجابات
جاوبيني ليه بغرق جوه البحور البور ؟؟!
العيب شراع قلبي .. ولا المراكب زور ؟!
جاوبيني ليه باقدر اغزل خيوط ضلمة
لو كنت مش هقدر أمسك في طرف النور ؟!
طبعاً مفيش تفسير .. والرد من غير رد ..
نعكس خطوط السير .. آخر طريقنا سد
حاولت أكون آدم واعيشك جنة
قطفت لك تفاح .. ف نزلتي بيا الأرض ..
ف بلاش نقول تاني إن اللقا عرفات
ده الارتباط سنة .. وإحنا فراقنا فرض