ياسر نور / يكتُب : هتلاقينى

#‏هتلاقيني‬
هتلاقيني لسه طاير
برشق العالم بورده
وجناحاتي لسه فارده
راميه ضله .. ضله بارده
مأوى للناس اللي شارده
وهتلاقيني لسه قادر
أعشق العشق اللي نادر
وقلبي مِتفتّح شوادر
للي بادر
وانتصر للحب جوله
وهتلاقيني لسه بحزن
لما واحد من صُحابي
ينقلب فجأة مُرابي ..
باع حلاوة لونه لَخضر
واشترى اللون التُرابي
هتلاقيني لسه بحلم
بانتصار الحق جداً
وانكسار الظلم جداً
وإن ديك الفجر يدن
على صُبح جاي فاكر ملامحي
ولون مطامحي
بينادينى وصوته قمحي
هتلاقيني لسه بحلم
‫#‏ياسرنور‬