ناقص روح بقلم الشاعرة : رماح رماح

ساعة الغيوم
الليل بدأ يحدف وجع
حس انسحاب الروح..

واتسرسب الخوف مستكين
حاول يمد ف ظلها..

الساعة وقفت والعقارب نوح
شد الضلوع يمكن يزود وقتها..

الكلمه حسره
ف حلقه كت متشعلقه
بس الحروف صوتها اكيد مدبوح
بات السكوت
ورغم أن الضلع موت
كان لسه مرمى ف حضنها..

البرد كلبش جتته
ويناير اللى كان بيهرب م الشتا
كان لسه داير جوه نبضه ودمعته..

شاف الملايكه فرحانين
جايين يزفوا عرسها
والطرحه كت ملكوت و طيف
نور كان بيسرق ضيها
وفرش حياته كلها فوق الكفن
وظنونه سابقه تقولها
على فين وبعدك انا يعنى ممكن اروح
سيبانى ليه نبضى عليل مجروح..

يا اللى انتى ماشيه اطمنى
انا بعدك انتى ماليش حياه
الأسم عايش والفعل ناقص روح