جوابي الحداشر بقلم الشاعر : إسلام دهشان

..
إلى أمي مصر : 
جوابي الحداشر - في أول نوفمبر 
و كان نفسي أعبر - بفرحي و سعادتي
لكنك جبرتي - بخاطر عدوي
و سيبتيني أعوي - في أرضك طليق
و قولتيلي يا ابني - قصادك طريق !
أدور عليه ... !
ما شوفتش معالمه
و لا حتى فاهمه - بيبدأ منين !! ؟
حواري الغورية - بتنده عليا
ف أبص بعنيا أشوفك ضلام !
و فين المقام ؟ يا سيدنا الحسين ؟
تعبت إنتي فين ..
هلف ف ميدانك - و أنا نفسي أسمع
كنيستك - آدانك ، و الأقي ف عيدانك كناريا بتضحك - يمامه بتفرك عشان تبني عش !
الأقي إن نيلك بقى كله مش !
و مالح و طالح و فاضح مقاوح و كل المصالح بترشي القانون !
ياريت إني أهون ،
عليكي يا أمي - تصفيلي دمي - و تنهش في لحمي - كلاب الغيطان
دنا من زمان -
و مكسورة عيني - و عريان جبيني - و بتمرمغيني - ف وسط التراب !
ف أنا بشتكيلك - و عمال أعافر
جوابي الحداشر - و ما سمعتيليش
جوابي الحداشر - و ردك مفيش
ياريتني اعيش - أو إني أقدر أصبر
على ظلم تاني - ﻵخر نوفمبر
أقولك - معاكي ﻵخر ديسمبر ،