تعرف إننا بقلم الشاعر : محمد أحمد فرحات

تعرف إننا كلنا مجانين
.وبنشبه بعض 
أمراضنا العقلية غريبة 
وبتقدم عرض 
رابطين في هدومنا الطوب والقش
وبناكل كفته في جوفها المش 
مجانين بشهادة وعندنا ختم 
بندحرج ـحلامنا قصادنا 
على فرده كوتش

مستشفى كبيرة 
وفيها جبيرة لشرخ الروح
وعلاج بيطول في المدة 
والعقل بيصغر ويكش
ملعونه الكهربا في دماغنا 
بتضلم فينا ما بتنورش
تزيدنا جنان وتقلب فينا بسواقيها
تمنع عننا سحر الألوان 
بتكعبل شوفنا في خطاويها

مجانين البدري 
والشيبه الجايه في العشرين 
الشعر المليان بالحسرة
أبو جدر حزين
وطموح الهجرة في المركب
مع ناس خايفين
مجانين الوضع المعكوس 
والخط النازل على تحت
مجانين الوطن
المكبوس في المكنة وإزميل النحت

عنبرنا كبير للعقلاء
اللي افعالهم مجانين 
بنشخص أسباب الداء 
وبنصرف للعقل روشته
متجيبش نتيجة ولو مره
وبتزود أوجاع الجته
عنبرنا براح بسراير قاسية مصديه 
منقوش على طرفها عبارات
هتعيش تعبان
وتموت تعبان من غير ديه