مين قال أصلا بقلم الشاعر : مصطفى ممدوح

مين قال أصلا
إن إنت بتخطر علی بالي ..
مش لما تغيب تبقی تجيني ؟!!

إزاي والبال مافيهوش غيرك
ملازمني
وقالب موازيني !!

دا انا حتی كمان كنت هعاتبك
واعملّك مَحضر
وقضية ؛
أصلك مستولی علی كياني
وماسيبتش شيء خالص ليّا !!

مش برضه دا ظلم ؟!!
بس انا راضي
دا الأصل أساسا والعادي
طبقا لحقوق الملكية !!

دي عنيا مابتفارق طيفك
دايما قدامها وبتشوفك
وبتوْصِل ليل بنهار وَصْلا ،،

وبتسأل هل أنا بفتكرك ..
مش لما أكون بنساك أصلا !!!