وليد مقار / يكتُب : صورنا القديمة

قصيدة #صورنا_القديمة
كل صورة عليها تضحك
كل كادر غريب اخدته
الشنب رمز الرجولة
لما لاجل عينيها سيبته
واما وشك كان مشلفط
اصل ضحكو عليك .. حلقته
حولة العين اللي سارحة
لما اخدو اللقطة فاجأة
فتحة البق العجيبة
قدام مسلسل كله رقة
واما ضبك غصب عنك
بان لان الضحكة صادقة
كومة القشر اللي تحتك
وانت بتأزأز تسالي
والصوابع فوق دماغك
عاملة شكل قرون مثالي
كل مرة عينيك تشوفهم
تبتدي الضحكة تلالي
لكن الفرجة بتختم
باللي مش معمول حسابه
دمعة العين اللي تسأل :
كل دا راح فين ياغالي؟
#بث_كدا
#وليد_مقار