وياما القلب بقلم الشاعر : محمود رضا

و ياما القلب شال م الدنيا دي أسرار

وياما العين بتقلب بير ملوهش قرار

يا كل دقيقة جيالي و جيبالي كاسات الويل

خلاص بكفايا طعم المر و العلقم ف حلقي دليل

منيش ناقص ، و مش عايز كمان منك

و مش عصيان ،،

لكن تعبان قوي ف ذُلِّك

أنا الخاضع لكل قانون ، رسمني ف دنيتك خاسر

و أنا المغلوب ف حزني بدوب

و حاضن جرحك ال آسر

بعيش فيكي

بحلم شحيح ما يكفيكي

لكنه ف قلبي زاد و معاد

بعيش على أملي و أتمنى

تصادف خطوتي الجنة 

ولكن بس قولي إزاي ،،، 

مفيش جنة تزهر يوم ف قلب جهنم الدنيا

ولا أعمار بتكمل لوم ف قلب الدقة فيه فانيه