جمّعت كام كلمة بقلم الشاعر : محمد صابر الخولي

جمّعت كام كلمة .. فعملوكي
فوقفتي على رجلك
وحبيتك 
وحفظت فيكي سنين
وصميتك
وسمعتك
وقدمتك
ورجعتك..

الكلمتين دول باختصار
على قد ما افتكرك
" بَحِبَك /
ما تتأخرش عني كتير
واحشني وبس
ومش بكدب
وصدقني
وبعض كلامك العفوي
في وقت عتاب "

الكلمتين مترتبين
مش موزونين
لكنّهم إنتي..
ركبت لك جناحين
في الحلم قوم طيرتي..
وفرحت بيكي كتير
وخدتني منظرتي..

قولتك لكل الموجودين
فاهمين ومش فاهمين
حطيت سيرتنا فـ سين
وفـ جيم وقُلنا وقال..
ما رضيتش أخبيكي
فيغيظك الإهمال..

ضفرّت لك شريطين
ببداية ونهاية..
شيلتك على كتافي
كما طفلة بكّاية..
وحايلت بيكي الناس
وعملتني ترباس
تربست بيه الروح
وسكنتي جوايا..

من مولدي شاعر
من لما حسيتك
بحروفي عـ الأوراق
وجريت ورصيتك

ضحكوا عليّ الناس
واستهزءوا بيا
قالوا إني مش عاقل
وبحب أغنية

قولتك وبالمعقول
بالشعر انا المسطول
بسكر بتنهيدة

الحب مش لازم
دايماً يكون حوا
فعشقت أنا " قصيدة "