هنلعب لعبة الأشعار بقلم الشاعر : محمود رضا

هنلعب لعبة الأشعار
هقولك و إنتي هتقولي
و نطوي ما بينا الف نهار
بوعد ف جنة هتنولي ،،
و تلقي هناك ،، حبيب مشتاق
لا عمره نسيكي ولا يقدر
و ااه يا لعبة الأشعار
حروفك قسمة و مقدر
معدش باقيلنا غير حضنك
نتوه جواه ،،
و نتواعد و نتكلم
معدش باقيلنا من روحنا ،،
سوى كام حرف من بوحنا
لا حد لحرفنا يفهم / ولا يفسر
سوانا و بس
و نبعد قد ما بنبعد / بنفس اللعبة نتجمع
معاها بداية القصة
و بيها و فيها بس نكون
معاها بنينا أحلامنا
و فيها الحلم مش بيهون
و لو كان حقيقي محال
و محض خيال
هنعشق حضنها الجنة
يا لعبة و فيكي ميت موال
بأسامينا بتتغنى
هنلعب لعبة الأشعار ،،
هقولك ،، و إنتي هتقولي •