خدعوك فقالوا بقلم الشاعر : أحمد خليفة

خدعوك فقالوا إن حبيبك
أول من يخلص لحبيبه 
لكن في حقيقه الأمر إنه 
مع أول موقف بيسيبه 
خدعونا ودايما يحكولنا 
عن ناس بنشوفهم في الأفلام
وننام وبنفضل نتحسر
وبنبقي مكانهم في الأحلام
وبنقرأ كتير عنهم روايات
لكن في الأخر كات كدبه
وإن الأحضان طلعت حكايات
وإننا هنعيش عالم وردي
زي ما ستي كات تحكيلي
أو إن الدنيا دي جميلة
أول ما أنا هأتعب تديلي
وكأني هأكون بطل القصه
وآخرها هأولع في المارد
لكن مع أول موقف صعب
أتعلم قلبي يكون بارد
فبلاش من صغرك تسمعهم
وإتعلم من موقف جالك
سيبك م الدنيا الورديه
ركز في حياتك وأحوالك
سيبك من إيد ممكن تخدع
إغزل في خيوطك وحبالك
وإعرف إن اللي بيحكولك
في حقايق دايما يخفوها
وبكرر اوعاك تسمعهم
الناس دي عمرها ما هأتحكي
لو وجع الدنيا مشبعهم
فأسمعني وبلاش تسمعهم