احمد الصارم /عضو فريق حالة شعر يكتُب : رحلة عمر

في رحلة عمر مليانة
سنين وسنين
بنعرف ناس ونعشقها
وبنكمل معاها سنين
وبعد سنين..!!
بتتبدل بناس غيرها
قلوب ووشوش غير
التانيين...
وكداب اللي يحلفلك
بإنه بجد مش فاكر
ده بيكابر...!!
ف عز الزحمة جوانا
صور عايشه بقالها سنين
وسنين...!!
صور مجروحة مختومة
بختم الحزن
بختم الفرقة مكتوبة
لكن بتحن
بلحظة وانت سرحان
بتتذكر وتتبسم
ويمكن برضه تتألم
لكن ماتقولش مش فاكر
اكيد فاكر
صحيح النعمة ف النسيان
لكن احيانا الذكري
بتبقي كيان
بتبقي حروف بتتشبك
علي الماضي
وتفتح صفحة مقفولة
بقالها زمان
ومهما تقولي مش فاكر
هقولك عيب
صحيح ماتت مشاعرنا
ف زمن الجيب
لكن جوانا في لسه
خيال انسان...!!
‫#‏احمد_الصارم‬