نجلاء محمد عضو فريق حالة شعر تكتُب :بقايا الميدان

البرد قارس
فارد ضلوعه
جوا الميدان.....
وخوفنا حارس
كل ترابيس البيبان....
والل باقي م الل فات
خط باهت لشعارات
بقايا هتافات
كشاهد ع المكان
والزمان
ع الل كان كابش ف حلمه
واستمات....
*****
يناير يازاير
قلوبنا الل دابت
ف حسنك وتابت
عن الحلم بيك....
يناير يا طاوي خطاوي
طاهره وبريئة اليك
مفيش فايده فيك...
وكل المآذن وكل الشوارع
وأرض الميدان الل شبعت
دماهم بتشهد عليك...
*****
مدينتك يناير
رافضة النجاه....
بتحيي ف خريفها
وتوقد صباه....
تعلي ف ضروحنا
وتسكب ف عرقه
سر الحياه....
يناير يا داير
تكفن
ربيعنا الل زهزه
علي غفلة منك
يطيح فينا بردك
ب بقهرك وظلمك
وتخنق بقايا ولادك
بقايا ضميرك
وتحني ف جبينك
فتصلب وجودهم
وتكتم ف صوتهم
فكمل جميلك
وسيبنا ف كنفك
نشاهد ف صمت
وانا بعتذر
ايه باقي وارد ينكسر
مش هانتصر
والل آمن بيك ف
يوم
خلاص كفر‘‘‘
يناير
انا بردو مواطن
ومصري وطبيعي
لا صلاح الدين
ولا بات مان
ايه يعني هايجري
لو آثرت الأمان
واهو الصمت ف زمان
الفتنه
قالولنا شيوخنا
انه ضرب مرخص
من ضروب الإيمان
فسمعا وطاعه
شيوخنا الكرام
خلاص
زهدت المناهده
وقررت اني انام
حبال صوتي كلت
وملت داء الهتاف
هسنكر ف حسي
وانسي ف نفسي
شهيد ف آخر المسيره
العسيره طويته
ف بردك
بريء بس ذنبه
إنه صدق ف وهمك
*****
راح اكلفت
ف روحي بكام بطانيه
واغمي ف عينيه
وراح اشرب ف شاي
عشان الصداع
يبطل يدق ف نافوخي
ويندب طيف
خيال حق ضاع
راح اخبي ف نفسي
وادفي ف روحي
واضخ
ف عروقي
شوية تجاهل
ورطلين بلادة
يناير حقيقي
السنادي
بردك زيادةة....""
ــــــــــــــــــــــــ
"بقايا الميدان"