وليه بتعاندي بقلم الشاعر : محمد صابر الخولي

وليه بتعاندي وتكابري وبتقولي :
مافيش.. و خلاص...
ما دام في غيابي موجوعة تفاصيلك؟
وليه ليلك
بيجي بسرعة ويطوّل ؟ 
مع انك
يبان انك
مافيش احسن من الأول! ؟
ماهو انتي زي ما انتي أكيد
ولسه كل تفاصيلك
زي ما هيا في مكانها...

ما دام قلبي ما مامتش قتيل
ولسه بتبكي عـ التفاصيل
فـ ليه الناس تعزيني..؟؟

ولسه شوارعك المرصوفة أركانها
بتمشيني
ولسه دموعك المالحة بتبكيني...

ولسه شفايفك العنّاب
بتزعل منى لما بغيب
وما بترضاش تخاصمني
فبتخاصم صباع الروج

ولسه الكحل عـ التسريحة زي ما كان...
ولسه عنيكي بتدمّع من البرفان..
ولسه السكة لعنيكي بتوه فيها
مافيش سكه بدون عنوان..

فـ ليه ما ارجعش زي زمان .. واغنيلك
صوتي يزعجك فجأة ..
فتضايقي
تروحي بعيد واناديلك..؟

أنا زيك ما نيش أخرس على الحرمان
و بتكلم و سامعاني
وشايفاني بدوق الذكرى ما استطعمش
غير الوحدة والغيرة
انا زيك... يا بايعاني