كت روح ملاك بقلم الشاعر : أدهم الزهيري

كت روح ملاك وإتبدلت 
سكنت في جثمان من بشر
صبحت خطر 
بنت أما كانت تبتسم 
كانت تضيف للعين بصر 
يوم لما مالت و إنتنت
كل الغوامق لونت
قلبت ورود
البنت كانت للوجود
تعني الوجود
عطش الفراق غير
ملامح قلبها صارت لهب
إحساسها قارنوه بالدهب
فاق الدهب
بس أما جه وزارها الألم
ياللأسف
بركان عطاء فجأه إتنسف
سيل من نزيف التغييرات
البنت صنعت م السكات
خنجر وحبة أقنعة
تدبح بإيد تمسح بإيد
دمعة عيونها المقنعة
البنت عملت موقعة
شهرت سيوفها على الملأ
سيفها اللي كان شبه الورق
بقى صلب شاف اللين غبا
مشاعرها صبحت مرعبة
كل المعاني الطيبة
فارقت ملامح وشها
نصر المعارك غشها
قدملها فروض الولاء
والطاعة جزء من الغباء
لشيطان غرورك ف أنهضي
دمي اللي سال مش للوضوء
ف بدم غيري إتمضمضي