مكتوبلك بقلم الشاعر : أحمد مرزوق

مكتوبلك تبقى بجد عبيط
مستغرب ليه
ما هو انت اخترت تكون كوبليه
من غنوة اتذاعت قبل العيد
الناس نسيوها فى اول يوم
و اتشغلوا فى فرحة و لبس جديد
و بقيت متشال
فى الدرج التالت مالأحزان
مش فارق مين فى الدنيا دى خان
او مين اتخان
فى الأخر كله اتباع ببلاش
و العمر اتوزع بالمجان
لساك بتسيب روحك لحاجات
و بتحسب بُعد الناس مسافات
و بتدفع تمن الهجر سنين
طب تعرف مين
كان نفسه فى يوم يوصل لعينيك
طب تعرف ايه
عن اول يوم اتباع فى ماضيك
طب تعرف ليه
اول مالمحت السكة بعيد
القلب اترجرج من جواك
فكيت المسكة و سيبت ايديك
صدقنى انا هابقى صريح وياك
هاتشارك لو فى دقيقة معاك
و اوضح ليك حبة تفاصيل
ده نص ادانة و الف دليل
اول ما منحت عينيك الشوف
و قدرت تشيل مالقلب الخوف
و ملكت معاك بعض الأدوات
و حجزت مكانك فى الأموات
سكينة الوقت اكيد سرقاك
سنتها عشان تقطع شراين
و فى لحظة ما انت خلاص هاتدوس
و طقوس الدبح حلال هاتجوز
يضربلك قلبك مليون بوز
يمنع تنفيذه بيد حديد
لساك مش عارف جواك ايه
مكتوبلك تبقى بجد عبيط