كنّا بقلم الشاعر : عمرو إبراهيم

و ليه دلوقتى بسترجع
حاجات عدت و فارقتنى؟
و ليه شفتك مفكرتش
أخبى حاجة وحشتنى؟

وحشنى نظرتك ليا ..
و حشنى نورك الصافى ..
و حشنى لمستك لما
تيجى ترسى على كتافى ..

ذهولى ف عز ما بنحكى ..
طريقتك و أنت بتقولى ..
و تريقتى على صوتك
و تريقتك على طولى ..

و دمعة فرحة تجمعنا
و مقسومة على خدين ..
و ضحكة فى عز أوجاعنا
تنسينا الألم لسنين ..

و نرفزتك على الفاضى ..
و كلمة "عمرو, أنا أسفة "
و قطة تقومك تجرى
تقولى إلحقنى أنا خايفة ..

و ايدك لما تتسحب
تجاه الخصلة تحييها
كأن الخصلة دى و ردة
على شعرك .. بترويها ..

أنا هسكت برغم إنى
بقولك و انتى حسانى
و عارف إننا كنا
و مش ممكن نكون تانى !!