النهاردة بقلم الشاعرة : نرمين علي

النهاردة
جاي بتتأسف بشدة
شوف يا سيدنا قد إيه من عمري عدى
من فراقنا للنهاردة
جاي بدور هادي وديع
كنت فين وأنا بعد منك
فرحي زي دخان سجايرك
كل يوم ببكي وبضيع
كنت مستنية ترجع
كنت مستنية أسمع: عاملة إيه
قلبي بعدِك مش مكانه ومش لاقيه
والحقيقة اني انتظرت
الحقيقة إني خسرت
كل عمري عشان ألاقي مكان لقلبي
جوه برواز م البداية ماكانش ليه
لسه برضو جاي بتسأل عاملة إيه
عاملة ناسية حد ياما خدعني فيه
لو هتدفع حق ألمي
حق سهري وكل عمري
شوف هتدفع قد إيه؟