ساجد بقلم الشاعر : أدهم الزهيري

ساجد بدون مايقام صلاه 
واخد عيونها قبلتك 
وعملت من ضعفك إله 
مع كل ركعة يموتك 
إعصاه بقى وانكر
وجوده على الملأ
وإكفر بكل من اتخلق
ع الأرض زيك زيهم
ربك غفور اطلب رضاه
وادعيه يسامح جهلهم
قتل النفوس مش موهبة
زرع الجراح ساهل قوي
بس القلوب الطيبة
تقدر ف تعفي ف تنطوي
وماتشتكيش
عاوز تعيش
لو فيك دموع إضحكلها
إكسر غرورها ببسمتك
لو طالعة اه وقفلها
شمخه رجولتك عزتك
ماتسيبش ذكرى تموتك
وماتنحنيش
الانحناء مش مجدعة
خليك كنحلة مجمعة من أكلها
تطرح عسل
وإضحك ف وش اللى اغتسل
من دمع عينك ف أنشرح
خليك أساس كل الفرح
واستنى تطرح زرعتك
واسجد لرب كريم علاه
واياك تتوه عن قبلتك