بنت الملاهي بقلم الشاعر : محمد صابر الخولي

هعود عن شروعي بإني اشتهيها
وهسكت وأسلّم
وابلم
واتلم
وأقفّل عيون البيوت لو تفوت ...
وأحاصر مشاعر
تحاول
تعبر
وتمتد خارج حدود التابوت ...

وهعمل كأني مفيش مني تاني
وبين السطور هبقي صعب المعاني

بعيش جوا ليلى
ماحدش دليلي
ووقت اما نيلي يجف أبقى أموت ...

هعود عن شروعي
يا بنت المدارس
انا قلبي جاهل في حُبِك ضعيف
ساعات ببقي واضح
ساعات ببقي غامق
ورق ذكريات
طايرة جنب الرصيف

ويمكن هفكّر
ولو روحي ضاقت
عليا في يوم
هبقي أحاول اقيسك...

لكنّي النهاردة مصمم أكمل
وأعود عن شروعي
بإني أبقى قِيسك

و تبقى انتي ليلى
جنينتي
ومدينتي
وزرعي
وخضاري وكام فرع توت...

هعود عن طريق العنين السواهي
يا بنت الليلالي

وبنت الدواهي
وحُب الملاهي
و كُره البيوت