تليفونك بقلم الشاعر : أحمد مرزوق

تليفون بيجيلى فى نص الليل
فبقوم مفزوع
• محتاج احكيلك عن همى
- ايه الموضوع
• من كام سنة و انا ميت عايش
بضحك من بره كتير لكن
من جوه الضحكة مخصمانى
و دايما موجوع
- مش فاهمك وضح من فضلك
• ارجوك مش عايزك تقاطعنى
من كام يوم و انا نفسى احكيلك
مش عارف ايه الى مانعنى
الصورة بتبدأ فى الاول دايما الوان
تدريجى بتقلب على باهت
و شوية شوية مع المدة
اسودها يبان
بتحس الكون دايما غامق
و شعاع الشمس بيدارى
خايف مالليل
و الليل بيلملم فى دموعى
يجمّعها عشان ترجع ليا
تدارى فى نقطة احساسى
تقلبها لويل
- تقصد بتخاف
• اقصد انا نفسى اكون شفاف
ينفد من جوه ضلوعى الضوء
فينور عتمة قلبى فافوق
- هادعيلك دايما فى صلاتى
يكتبلك خير
• ادعيلى اطير
اتوحد بكيانى و روحى
مع اقرب طير
ادعيلى اسافر مالماضى
و اجرب طعم المستقبل
و اعاتب قلبى عشان فاضى
و اساوم روحى عشان اقبل
ادعيلى انى احكيلك تانى
او اقولك حاول تنسانى
- استنى اسمعنى عشان عايزك
طب اكتب عندك عنوانى
و بيفصل خطه مع الكلمة
من غير ما يزود و لا كلمة
فبراجع نفسى ان انا عاقل
او انى بجد بقيت مجنون
لما بشوف الرقم الوارد
فبيظهر رقمى على التليفون