رباعيات الخولي بقلم الشاعر : محمد صابر الخولي

(1)
مسقط رأس القمر الليل ..
وطنى الأصلي في قلب النيل ..
يُحضن مركب كون بدراعه
يعرق طمي الأرض نخيل ..

(2)
طول القنايا في الغيطان مشوار..
القمري هام.. خد رتبة الطيار..
النار شافتني.. طرقعت عيارين
فضحت في قلبي فرحتين ونهار..

(3)
نطلع من الموال ونخش عـ السيرة
الكُم وِسع البال والعِمّة تشميرة
الليل يخاف الشمس والشمس بتهابنا
تهرب تجيب الليل من بس تكشيرة

(4)
الأرض تِسكَر ليه وصاحبها مش مسطول ؟
تتجن عـ المجانين وبتعشق المعقول
والناس بناس بتعيش وصعيدنا عاش بينا
يا بلاد تحب الغيط أكتر من المَحصُول

(5)
الأرض : عرض وطول ...
الطين : بيوت وعقول...
العلم للتايهين
بيفوّق المسطول ..

(6)
أنا أقدم أبناء الكوكب عشقاً للطين ..
الريق مية.. وتراب يا كتاف البني آدمين ..
مخلوق منها..وهيجي اليوم
تبلعني في جوفها واعودها جنين..

(7)
إيديا مُشتاقة... للمنْجَلِين والفاس
الأرض شرْقانة.. والنيل بيشرب ناس
الليل يسيبني جعان والبرد زار الروح
ويروح يزق الباب ويغطي فـ الحُرّاس

(8)
الزير بينقط ليه والمحبس كان مقفول...
الغربة بتنضح ليل والمغرب مات مقتول…
الأرض لمين؟ لله والبني آدم حبساه
غفلنا الدود إياه واندار أكل المحصول...

(9)
ما تصدقوش الميكروفون..
والسادة أرباب الدقون..
والكرسي أبو رجول مش عجل
والحرف لو صاغ القانون..

(10)
عندك من الأسباب كتير
عندك من الجناحات يطير
بس انتي رافضالي الهروب...
عندك من الأحرار أسير

(11)
الحس صوت والصوت نفس..
الضلمة خوف والنور ونس..
العبد عبد في وسط ميت مليون براح
والحر حر في وسط مجموع الحرس

(12)
ولسه باقي ترياق العسل عـ السم..
ولسه لون الإفتري واخد حمار الدم..
مهو أما نخلص للفناء ونزول
يا إما حبل المفتري يتلم

(13)
مشحون شجون وشجون ...
والتون حزين محزون ...
خد مني مليون آه
ما يقلّش المخزون ...

(14)
الشوك طريق والشوق وِحِش
بلمح خيالي فـ بندهش
من وقت ما سابني الونس
لا اشتاق لي يوم ولا بتوِحِش

(15)
وجنيه حديد من غير خروم
هوا اللي فاضل في الهدُوم
لو عـ العموم حد إفتكر
رنوا الجرس و أنا مش هقوم

(16)
يا ملامح.. بتلاحق دايما.. على طرف جميل ..
تخاطيف المغرب مسروقة فـ أنصاص الليل..
تجاعيد الحيط المرسومة على هيئة شرخ
بـ تأول دايما على إني مهدود الحيل ..

(17)
من بين كتير مظاليم.. بقيت جاني
و رمش عنيكي سجاني
وجاني مـ الغيطان أموات
ما جاني حد عزاني

(18)
حنين كرسي الفراشة للبكايين عـ العضم...
خلاه في شادر فرح يندب ويشبع لطم...
والزفة فوق للسما والمعزومين من تحت
بالنحت في الأوجاع بيعلموني القطم..

(19)
الإيد بتعشق حضن إيد (هىّ )
أم الشعور فى الحر شمسيّة
حَضَرِت فـ غاب كل الحضور عـ الارض
غابت فـ غاب النور والإسم صبحية

(20)
طب هل خدودها بتتكسف زي البنات؟
أو حتى يعني بغمازات؟
بتحب تتعلق على طرف الهوا...
وتكلمه وتشم رد البرفانات؟

(21)
من وقتها ما بقتش حمل المعجزات ..
يا أم الخدود الشفتشي والغمازات ..
من وقت سطرك ما اتكتب من غير مناسبة وانتهى..
والله يمكن قبلها.. والحبر مات..