لمَّا تدعي لقلبي قول بقلم الشاعرة : هاله عماد

لمَّا تدعي لقلبي قول:
(يارب هون )
كل إحساس بالأمل 
مبقاش حنين 
والجميلة أم الضفاير 
شوقها حاير
بين فقير عاشق ترابها
وبين وزير والآشية معدن
بين فراشة قيدوا جناحات كلامها
والسفيه ماشي في طرقاتها
يدندن
بين ضفايرها الطويلة
اللي خانقة كل حيلة
والمقص اللي ف إيدها
فايته غاية
مش وسيلة
لمَّا تسأل عنى
إسأل حاجة تنطق
نور ف شباكى المحندق
نام عشان الحلم جايز
م الحقايق يبقى أصدق
قلبى مرهق
شوق ....وشوف
عمره ما لام ع الظروف
بس أشباه البشر
كتروا أوى
كل كدبة جديدة
بتشوه حروف
كل معنى مختلف عن أصله ليه؟
واللي فاضل لينا إيه؟
غير أمل واجع قلوبنا
بس برضو بنشتهيه
إدعى دعوة بقلب مؤمن
إدعى
وأنا قلبي يأمن
نلقى ف عيونها الجميلة
حلم
شوقنا ....إليه .