قصيدة/(إنسان مكبوت)
...........................................................
جوه نفسي انا محبوس
وخايف من اللي حوليه
عديت العفريت في فانوس
وتعبان من اللي فيا
انا مش قادر اتحرر
ولا قادر اكون مفلوت
انا المحبوس انا المكبوت
انا الخايف من الذكرى
انا الخايف من الأيام
وبتكلم. مفيش احلام
انا المسجون داخل قضبان
في كل مكان
كتبت اليأس لي عنوان
انا المسجون داخل نفسي
سعات بصعب على نفسي
وحاسس إن انا في توهان
بشوف الدنيا دي ساده
مبيعديش عليا الوان
ببيع احلامي بالمجان
ببيع مستقبلي عتمه
لا ليه عازه ولا لازمه
تعالى قرب وخد مكيال
ما بختي مال
كتبت لنفسي مييت(100) موال
كتبت بريشه مغموسه دم
وعزفته على ربابتي
وغنيته على الاطلال
ما عمري عدى متسرسب
وانا بحسب سنين بتفوت
سنين بتلف وتعدي
ومين كدي
دانا واحد ضايع املي
ونايم وامنيتي الموت
انا المسجون داخل نفسي
انا المحبوس انا المكبوت
...........................................................
بقلم الشاعر/ هشام الدكر
مــجلة فريق " حالة شعر "
الثلاثاء، 9 فبراير 2016
هشام الدكر / يكتُب : إنسان مكبوت
0 التعليقات
الاشتراك في:
تعليقات الرسالة (Atom)