سمير شومان / يكتُب : إتعودت

*** إتعودت..!! ***
إتعودت..
إتعودت أحاسب نفسي
قبل ما أحاسب كل الناس..
وإتعودت أعاتب نفسي
_ لو غلطان _
ودا عَندي أساس..
..
وإتعودت إنْ أنا لو هأشكي
إنْ تكون شكوتي لله..
وإنْ أسَبَح ربّي وأصلّي
وإنْ تملّي أبقا معاه..
..
وإتعودت إنْ أنا مأبكيش
حتّى فى عِز ما أكون مَوجوع..
وإنْ ما أمدش إيدي لغيري
حتّى لّو راح أموت م الجوع..
وأما تِضيق أيامي عليّا
ولاّ الدنيا تُغدر بيّا
صعب تلاقي فى عيني دِموع..
..
قالو عليّا زمان من صُغري
إنّي مَبعرفش التكشيره..
لَكن بَعد زماني ما عَجّز
بَرّسم ضحكتي بالطباشيره..
وأمّا حاولت إنّي أضحك مَرّه
قامو سجنوني
وقالو الضحك أصبح غالي..
وأمّا سألت تُهمِتي ايه
قالو بتضحك وبصوت عالي..
..
وأنا مِتعوّد.....
ربّي ميحرمكوش م العاده..
إنّي أما أشرب فنجان قهوه
يبقى زياده..
قالو هنعمل بُن مِحوّج
قوّلت دي فُرجت
القى الفنجان عاده وساده..
بس دي عاده..
..
لمّا بأقوم علشان أتكلّم
يبقى كلامي يا دوب ع الأد..
والغلطان أنا أقولّه فى وِشه
أنا معرفش أجامل حد..
بَس بأحب أعيش ببساطه
حَبه هِزار وشويه بجد..
..
متعودتش أبص لغيري
واللّى في إيده خلاص مُش ليّا..
وأمّا بأحب بأطيّر طيري
_ وأسيبه يلف _
لّو هيلوف هيعود لإيديّا..
وإنْ يوم شَط بعيد أو حَط
يبقى أنساه مَيلومش عليّا..
..
هيّه عاداتي ودي تقاليدي..
صعب أغيّر ولاّ أبدّل
أصل أنا عَندي عرق صعيدي..
بس حاولت إني أكتب ليكم
وأعرفكو عاداتي بإيدي..
..
#سمير_شومان