بص يا ابني بقلم الشاعر : عمر فواز

بص يابني ..
خُد كام نصيحة للزمن
واسمع كلام ..
ماتقدروش مره بتمن

(1)
عشق الوطن
مش شعر
عشق الوطن .. أفعال
توب الكلام معقود
على كل "قيل" أو " "قال"
عشق الوطن مش غنا
ولا كلمة ف الموال
عشق الوطن للوطن
مش عشق سُكنَه ومال..

فاشقي ف سبيل الله
ومسيره ييجي النصر
وافدي الحياة .. بحياة
وهتحيا كلمة "مصر"
..
(2)
مهر البنات ..
لساه منبت جوه قلبك م المشاعر
ف إياك تقول إن إنت شاعر
ساعتها راح يستنزفوك
ويكتفوك ..
جوه القصايد .. والبيوت
وهيضحكوا لو يوم تئن
إياك تبيع الدمعتين ..
علشان .. تحن
..
(3)
هجر الأحبه ..
أقوي من إن إنت تقدر تحتويه
بساعتين بكا و
حضنين سكوت
الهجر موت ..
حضن الأحبه ف لإشتياق
منجم ياقوت ..
تبت يا ولدي ف اللي حبك
واللي كان العمر جنبك
مش ناسيك
العيب تملي لو هينسوا
يبقى فيك
ده عشان ما سبتش ذكرى
بتعلم ف جوفهم
ولإنك انت كنت شوك مزروع ف خوفهم
فماتستحيش
يكفي إنك إنت لسه فاضل
رغم كل التشويهات
يكفي إنك إنت لسه فيك
كام حاجه فاضله عشان تعيش
فما تستحيش
..
(4)
هجر القصايد
أقوي عالضهر بحوالي 1000 سوط
ف بلاش تكلفت كل شعرك جوه نعش
وتشيعه لمسواه الأخير
القلب ده ..
لساه يا ولدي ما تلسعش
القلب ده ..
لساه بخير
..
#عمر_فواز