روحي الإزاز بقلم الشاعرة : شيماء كامل

وماليش إيدين..

ده لأن إيدي مشعلقة فوق للسما ..

باقي مني بس ف وَحلِتي..

باقي بدن في المحرقة ..

والروح بتسكر م الوجع ..

والكِتف كِيفُه الطبطبة 

ومافيش ف عيني أنا ليه خضوع ؟؟

يغسل من الروح صهدها ..

ده أنا كان جنين عيني الدموع /ليه بتجهضوه قبل اللقا..

وإزاي أروح له وسِكتي بذنوب كتير متفرقة 

الذل شالل خطوتي ..

مربوطة للجيد بالمسد

محسودة ليه على حسرتي ؟؟

ورَقُونى بالطوب م الحسد 

رسموا العروسة من الظنون 

وموتوا ف روحها الورق

وميعرفوش إن اللي روحه من الإزاز ميت بطوبة ..

مهمهوش إنه اتحرق !!