إعدل كلامك بقلم الشاعر : سمير شومان

إعدِل كلامك وإتظبط
وبلاش عَبْط..
متقولناش...من أجلكم
وإني إبنكم
ومتعرفوش أنا أد ايه بحبّكم..
رشّحت نفسك بس
علشان الجنيه..
وعشان جنابك تبقى بيه..
وعشان يقولوا....
حضرة النائب ذهبْ
حضرة النائب وصلْ...
حضرة النائب بقا
بيقول كلام زي العسل..
أول ما هأنّجح
الفقر بَحْ ....خلاص مفيش..
الناس بقا في بلادنا دي
لازم تعيش..
أول مشاريعي الكبيره عندكم
هنّسقف الدايره بإزاز..
دا متعرفوش أنا أد ايه بحبّكم
وأد ايه أنتم على قلبي عُزاز..
تاني المشاريع للغلابه المحرومين
نصرفلهم وجبّه كنتاكي ببلاش..
والسهرانين المسطولين
نعملهم بعني مَعاش..
والمعدومين العِريانين البردانين
هنجيبلهم مِترين قماش..
..
بلاش بقا....
وكفايه مشاريعك يا عَمْ..
شِبعّنا هَمْ..
..
إعدِل كلامك وإتظبط
خنقتنا...
مبلاش عَبْط..