عصريات بقلم الشاعر : محمد حماده

الشعر تاه مني 
والخلق تاهمني
واللي مهملني 
صونته ولم أجرح
أصل الجدع موقف
أصل الجدع حاله
واللي جدع ينصف
صاحبهُ ولو هيموت
ولا كانش يتعالى
ما الوِد راح مني
والناس ما راحمني
سيبت البراح إني
محتاج حنان يطرح
ضميني يا خَالة
مليت أنا المسرح
وزهقت م التمثيل
إنَ الحقيقة خير
لازمة ف كل زمان
كسرتنا م الكِـتمان
والله لا أبرَح
حتى أقول الحق
ضميني يا خَالة
لمي الجراح لمه
وإهدي الحزين لما
يبكِي ويتغمى
خليني أستفرح
لو حتى كان بالزق
ضميني يا خَالة
وإحكيلي عن أُمي
خليني أتباهى
بالروح مابين دمي
واعفينى لو هجرح
ضميني يا خَالة
وإسقيني من زمزم
نسيني كل الهم
خلينا يوم نفرح
خلينا يوم نمرح
نرجع نقول الشعر
والخلق تفهمني
والصحبة تبقى الفعل
غلطان تفَهمني
ضميني يا خالة
من غير ما أقول وأشرح
لو كنتي مش ضامه
والله لا أبرح