مصاحب موبايلك بقلم الشاعر : أحمد خليفة

مصاحب موبايلك
حبيبك جيتار
وكل اللى شالك 
سرير بالنهار
بتخرج لوحدك
وبتجيب هدوم
تشّـكر فى نفسك
تزيد الهموم
وقاعد فى لمه
وتعرف فى ناس
صحابك يزيدوا
جماد كل يوم
بقلّـب فى صورى
وكاميرتى ولابي
وأعلق همومى
وأشيلها فى دولابي
بدور مابينهم على أى صاحب
بلاقي إنى دايما بودع صحابي
برغم المعارف صحاب أو قرايب
ماحدش فاضيلي وموجود معايا
وأحس فى وسط الجموع إنى غايب
وفى الأخر أضحك لصورتى فى مرايا
برغم إنى دايما كتافى فى كتافهم
بحاول أعيش وأعدي الحكاية
وبضحك فى أول ماحس بدموع
وبحضن فى نفسي وأطبطب عليا
وأكلم فى نفسي واسمع فى صوتى
بينده يقولى ماتهدى شوية
برغم وجودكم فراغي يزيد
وحاسس بإنى إتحبست فى تابوت
رساله وليكوا هأتوصل هأتوصل
هأتعرفوا قيمتي بعد أما أموت