ماشى ولا بايدى الوقوف
والدنيا ماشيه كمان بخوف
والشعر ايه غير الحروف
والرك عالشاعر وذوقه
والعمر لو علقم حادوقه
مضطر اعيش
عشان مافيش
تيار مساره ضد الظروف
ماشى ولا بايدى انتظار
من غير هزيمه ولا انتصار
بخاف اواجه انكسر
وبخاف اكون سبب انكسار
عايش حصار مع انى حر
من برا عادى ..افيد ..اضر
من جوا حاسس انى هش
برج اتبنى فى اساسه قش
او نعش يستر ما انكشف
او فيض شغف باللاوجود
من غير هدف
من غير حدود
من غير ملامح فى الطريق
ماشى ولا بايديا شئ
حاسس كأنى
غصب عنى
مضطر اعيش
مضطر اكون
مضطر اكسب
مضطر اكدب
مضطر اصون
مضطر بعد الاضطرار
اعيش محتار مابين حاجتين
مايختلفوش فى مضمونهم
الاضطرار
الانتحار
وما بينهم سنينى عجاف
لا بتهدّى ولا بتخاف
ولا شاف العذاب قدى
ولا ضدى ولا معايا
وجوايا ...
انا ضدى
لأن المشكله عِندى
وخوفى انى امشى طول العمر
لبعد نهايات الحياه بمسافات
لحد الصراط
وانا مضطر
#ahmedabdellateef
0 التعليقات