الشعر ملجأ بقلم الشاعر : أحمد عبد اللطيف

الشعر ملجأ كل هارب للنجاه
م الواقع الضنك السخيف
ومن الالم 
ومن الحياه
وانا شعرى مش ورقه وقلم 
او حشو كام جمله ب حروف
انا شعرى خوف ....
من الظروف ومن الزمن
مع انى دافع تمن
وجع سنين جايين
مع وجع سنين فاتت
فى حنين لناس ماتت رغم انهم عايشين
الشعر نوم السهرانين بيداوو فى ندوب القلوب الطيبه
الشعر نعمه وموهبه بتشغل فراغ الموجعين
الشعر معنى وكلمتين ومجاز
وان جاز وجود الوزن والقافيه
مش كل حاجه نقيسها بالانجاز
ولا كل حاجه ناخدها بالعافيه
فى قلوب ازاز تكسر قلوب البشر
وفى قلوب فولاز وطيبه وصافيه
ف بلاش نجيب العيبه ف اللى انحاز
وبلاش نبرَّأ نفسنا من العيب
ونقيس قيمتنا بمالنا او بالجيب
ونسيب قلوب حبايبنا موجوعه
واحنا اللى مش عارفين ف علم الغيب
يمكن هييجى بكره مع موتنا
ونسيب سكوتنا ذكرى لينا ف الكون
ونسيب كلامنا لسطوة المكنون
ونسيب اهاتنا ليداويها الريح
والموت بييجى مفاجأه بلا تصريح
فى دنيا ماشيه عكس الاتجاه
فالشعر ملجأ كل هارب للنجاه
م الواقع الضنك السخيف
ومن الالم...
ومن الحياه.