نشيد القطر بقلم الشاعر : ضياء فريد

------
صفرت ليه والسكة محبوسه
تمشي تلاقي عـ القضيب مساكين
واقفين عيدان دبلانه للسكاكين
بيزقوا فيك تمشي وما بتمشيش
بشدوا فيك م الرغبه في الدوسه
تاكل بيوتهم زي لقمة عيش
.
صفرت ليه .. والحلو ما يصفرش
وانا نعش ماشي بيحبي داخل نعش
زفوني ليك ميّت .. نفخت .. صحيت
وشربتني كالرغوة من ع الوش
ونقشتني بقعة وسخ ع الحيط
يا قطر مين يشبه لنا في النقش
سايس سياسي ولا ودن شاويش
ولا أفيش لمفيش وفيش بالغش
.
يا ريت تقولي لو في يوم عديت
على خد حلوه طرحها وردي
بأمانه لو شاورت إليك هدّي
هدّيت ! ولو هديتلي مليون بيت
هفضل أمد لطرحها .. وادّي
البنت ساقيه كفها عِندي
طرحت عيدانها ع القلوب أفراح
والضل دا مرسوم على قدي
كل اما اميل .. يسقط التفاح !
.
سمعني ليها 100 قصيدة شعر
مكتوبه فيا .. أو مجازاً فيك
دبحت ليه حرفي على الشبابيك
ورمتني فوق المزلقان حواديت
ماشي على سطرين وسايب سطر
والناس هوامش.. والبيوت شخابيط
يا قطر .. ليه سموك كدا يا عبيط !!
مين اللي جر فـ مين .. ومين اتجر
وانت اللي مسحوب الخطى للمُر
متغطيين بيك .. وانت من غير غطا
ستراً عليهم كل برد وحر
ما تقولي ليه دايخ كفا الله الشر
الحمل دا عن مين .. ومين من مين!
إنت الوطن .. وللا اللي فيك واطيين
بتكح ليه الغل بين الخلق
والحمل ميت فيك بقاله سنين
صحيته ليه ساعة حلول الطلق
والخوف دوا للي دواه في دواك
.
يا قطر ليه ترميني م الشباك
وانا رغم طول الرحله دي وياك
بقطع تذاكر للعيال بسكوت
واصبغ شفايف ضحكتك بالتوت
والتوت أكيد أطعم لنا م الدم
قطعني .. تلقى بين ضلوعي سكوت
أخرس .. وطول الرحله عالي الصوت
قطعني تلقى ألف باب للروح
مفتوح عليك للخلق من غير هم