لمَّا تكون متأكد بقلم الشاعرة : هالة عماد

لما تكون متأكد إنك 
برة الدايرة 
ماتبينش مشاعر حايرة 
ولا تعلنها 
ومتسألشي بكام الناس بتبيع أشواقها
إلا أما تحوش في تمنها
أصل جيوب قلبك مليانة حوايج ياما
إلا الحب
أصل صحيفة وجعك بهمومك مليانة
مش محتاجة لحزن بيلمع
ف/يزينها
خنت سكوتك ليه م الأول
ليه فكرت كلامك ممكن
يخلق فيهم حلم بيضحك؟
ليه في صحاري
بتبدر قمحك؟
ليه بتسلم روحك دايما طرد موقع
ويا رسالة حب لناس
نسيت عناوينها
عادي
استجدع
إمشي كأنك لسة بتعرف فعلا تمشي
ماتبينشي الخوف والحيرة
ماتسلمشي
غمض عينك
يمكن تقدر تخنق دمعك
جوا جفونك
والتنهيدة اقتلها ف صدرك
وأوعي تصدق
تاني حنينها